Fara beint í efni
FagmennskaSamvinnaFramsækni

Raunfærnimat

Raunfærnimat er formlegt mat á þekkingu og færni sem þú hefur aflað þér utan skóla – með starfsreynslu, starfsnámi, námskeiðum, félagsstörfum og lífsreynslu. Matið greinir hvar þú stendur, metur færnina til eininga og gefur þér kost á að ljúka iðnnáminu sem þú hófst á sínum tíma. Rúmlega 500 manns hafa lokið raunfærnimati í iðngreinum hjá Rafmennt.

Fyrir hverja?

Raunfærnimat er fyrir þá sem hafa starfað í rafiðnaði eða við hljóðtækni – upptökur, hljóðvinnslu og mögnun – án þess að hafa lokið námi í greininni.

Mat á

Lágmarksaldur

Starfsreynsla í greininni

3. þrepi

23 ára

3 ár

4. þrepi

25 ára

5 ár

Greinar í boði

Ertu í stuði? – rafiðngreinar

Fyrir þá sem hófu nám í rafiðngreinum en luku því ekki. Metið er á móti námskrá, út frá hæfniviðmiðum áfanga í grunndeild og fagnámi, svo hægt sé að mæta þátttakendum hvar sem þeir eru staddir í náminu og koma þeim aftur af stað. Þegar öllum námsþáttum er fullnægt fá þátttakendur rétt til að þreyta sveinspróf – útskriftin sjálf er úr skóla, ekki frá Rafmennt.

Verkefnið er unnið í samstarfi við Rafiðnaðarsamband Íslands, Fræðslumiðstöð atvinnulífsins, Tækniskólann, Fjölbrautaskólann í Breiðholti, Samtök rafverktaka og starfsgreinaráð í rafiðngreinum.

Nánar um Ertu í stuði? →

Ertu í hljóði? – hljóðtækni

Metið er á móti færnikröfum sem faghópur úr ólíkum greinum hljóðtækni og stjórnenda setti saman, með hliðsjón af námskrá í hljóðtækni (2020) og þeirri færni sem hljóðmenn þurfa í starfi. Þegar öllum námsþáttum er fullnægt fá þátttakendur burtfararskírteini í hljóðtækni.

Verkefnið er unnið í samstarfi við Skerpu, Fræðslumiðstöð atvinnulífsins og Tækniskólann.

Nánar um Ertu í hljóði? →

Hvernig ferlið gengur

  1. Umsókn á Innu

    Þú sækir um rafrænt á Innu á umsóknarfresti.

  2. Kynningarfundur

    Eftir að umsóknarfresti lýkur eru verkefni ferlisins kynnt á fundi á Teams. Dagsetningar eru í dagskrá haustsins.

  3. Færnimappa

    Þú bókar fund með náms- og starfsráðgjafa, sem aðstoðar þig við færnimöppuna, fyllir hana út og skilar á Innu.

  4. Gátlisti – sjálfsmat

    Á gátlistafundi er farið yfir gerð gátlista fyrir sjálfsmat. Þú metur eigin færni, skilar á Innu og ferð yfir sjálfsmatið með fræðslufulltrúa.

  5. Matsviðtöl

    Metendur – fagaðilar í greininni – boða þig í viðtöl. Þar kemur þú þekkingu þinni og færni á framfæri og getur verið beðin/n að sýna hana eða vinna úr lýsingum á aðstæðum. Náms- og starfsráðgjafi getur setið viðtölin þegar það á við.

  6. Niðurstöður og næstu skref

    Niðurstöður eru skráðar á Innu. Þú getur bókað tíma hjá náms- og starfsráðgjafa sem fer yfir þær með þér og ræðir næstu skref.

Ítarlegri lýsing á hverju skrefi, matsviðtölunum og lokamarkmiðum eftir greinum: Raunfærnimatsferlið →

Hvað kostar raunfærnimat?

Þátttakandi

Gjald

Hefur ekki lokið námi á framhaldsskólastigi

Að kostnaðarlausu

Félagsmaður sem hefur áður lokið einingum í raunfærnimati og/eða lokið framhaldsskólanámi

50.000 kr. fyrir önnina, óháð einingafjölda

Aðrir sem hafa lokið formlegu námi eða áður tekið þátt í raunfærnimati

186.000 kr. þátttökugjald og 2.280 kr. fyrir hverja staðna einingu

Kynningarmyndband Fræðslumiðstöðvar atvinnulífsins um raunfærnimat

Við fylgjum þér í gegnum allt ferlið