Raunfærnimatsferlið
Þegar þú hefur ákveðið að taka þátt í raunfærnimati fer eftirfarandi ferli af stað.
Undirbúningur
- Umsókn
Þú fyllir út og sendir umsókn rafrænt á Innu.
- Kynningarfundur
Þú mætir á kynningarfund þar sem verkefni ferlisins eru kynnt.
- Fundur með náms- og starfsráðgjafa
Þú bókar og mætir á fund þar sem þú færð meðal annars aðstoð við gerð færnimöppu.
- Færnimappa
Þú fyllir út færnimöppuna og skilar henni rafrænt á Innu.
- Gátlistafundur
Farið er yfir gerð gátlista fyrir sjálfsmat á færni.
- Gátlisti
Þú fyllir út gátlistann og skilar rafrænt á Innu.
- Fundur um sjálfsmatið
Þú bókar og mætir á fund með fræðslufulltrúa um sjálfsmatið.
Raunfærnimatið
Metendur setja upp viðtalstíma með þátttakendum og þú mætir í matsviðtölin. Raunfærnimat byggist á samtali milli þín og metanda, sem er fagaðili í greininni, þar sem áhersla er lögð á að þú fáir tækifæri til að koma þekkingu þinni og færni á framfæri. Þú getur verið beðin/n um að sýna færni þína, fengið lýsingar á aðstæðum til að vinna úr, eða aðrar aðferðir sem gera færnina sýnilegri. Náms- og starfsráðgjafi getur setið í matsviðtölum þegar það á við.
Eftirfylgd
Allar niðurstöður úr matsviðtölum eru skráðar á Innu. Þú getur bókað tíma hjá náms- og starfsráðgjafa Rafmenntar sem fer yfir niðurstöðurnar með þér og ræðir næstu skref.
Lokamarkmið eftir greinum
Í stuði – rafiðngreinar
Matið er á móti námskrá, út frá hæfniviðmiðum áfanga í grunndeild og framhaldsnámi rafiðngreina. Þegar öllum námsþáttum er fullnægt fá þátttakendur rétt til að þreyta sveinspróf. Ekki er hægt að útskrifast frá Rafmennt; allir sem þreyta sveinspróf þurfa að hafa útskrifast úr skóla. Nánar um Ertu í stuði?
Í hljóði – hljóðtækni
Matið er á móti námskrá, út frá hæfniviðmiðum áfanga í hljóðtækni. Þegar öllum námsþáttum er fullnægt fá þátttakendur burtfararskírteini í hljóðtækni. Ekki er hægt að útskrifast frá Rafmennt. Nánar um Ertu í hljóði?
Í ljósi – viðburðalýsing
Matið er á móti færnikröfum sem faghópur úr ólíkum greinum viðburðalýsingar og hópur stjórnenda settu saman. Færni þeirra sem starfa við viðburðalýsingu var kortlögð út frá verkefnunum og hæfninni sem starfið krefst.
Í mynd – kvikmyndatækni
Matið er á móti námskrá, út frá hæfniviðmiðum áfanga í kvikmyndatækni. Þegar öllum námsþáttum er fullnægt fá þátttakendur burtfararskírteini í kvikmyndatækni frá Stúdíó Sýrlandi. Ekki er hægt að útskrifast frá Rafmennt.