Merking vinnusvæða. ÖRYG16Merk vinnusv

Námskeið í samstarfi við Opna Háskólann í HR

Um námskeiðið

Staðnám með möguleika á fjarnámi

Námskeið um hönnun og útfærslu á merkingum fyrir umferð vegna framkvæmda. Það er mikilvægt að slíkar merkingar séu samræmdar, bæði gagnvart starfsmönnum og vegfarendum.

Á þessu námskeiði er farið yfir helstu þætti sem þarf að hafa í huga á vinnusvæðum, eins og umferðarstjórn, lagaumhverfi, öryggisbúnað og merkingar, eftirlit og fleira.

Starfsmenn Vegagerðarinnar og Reykjavíkurborgar sem koma að merkingu vinnusvæða, ásamt verktökum, hönnuðum og eftirlitsmönnum sem tengjast verkefnum á þeirra vegum, verða að ljúka þessu námskeiði. Í lok námskeiðs þreyta þátttakendur próf til réttinda.

Efnisþættir námskeiðsins

• Lög og reglugerðir, flokkun vega og gatna, umferðarmerki, flokkun og tegundir, umferðarstjórn

• Vinnusvæðið, umgengnisreglur, framkvæmd, ábyrgð og eftirlit

• Rammareglur um merkingar vinnusvæðis / framkvæmdasvæðis

• Varnar- og merkingarbúnaður, ljósabúnaður, merkjavagnar, vinnutæki og öryggisbúnaður

• Lagnavinna o.fl., leyfisskyldar framkvæmdir á vegsvæðum

• Vinnustaðamerkingar á tveggja til sex akreina vegum og við staðbundna/hreyfanlega vinnu

• Magntaka, kostnaðaráætlanir, gæðaúttektir og févíti

Fyrirkomulag

Allt kennsluefni er í rafrænu formi og prófin líka. Þátttakendur fá aðgang að kennslukerfi háskólans og þurfa því að hafa afnot af tölvu með aðgengi að PowerPoint forritinu.

Námið er hannað sem staðarnám. Fyrir þau sem búa úti á landi bjóðum við upp á að fylgjast með kennslunni í gegnum Zoom. Í slíkum tilfellum fer kennslan samtímis fram í kennslustofu og í gegnum Zoom fjarfundarbúnað í rauntíma. Kennslan er ekki tekin upp.

Réttindapróf

Í lok námskeiðsins þreyta þátttakendur próf til réttinda. Þeir þátttakendur sem standast prófið fá prófskírteini sem gildir í 5 ár. Þeir sem eru með skírteini eldra en 5 ára þurfa að endurnýja sín á þessu námskeiði, en boðið er upp á styttra námskeið til endurnýjunar réttinda fyrir þá sem eru með skírteini síðan fyrir 5 árum eða skemur.

Um merkingu vinnusvæða

Í reglugerð um merkingu og aðrar öryggisráðstafanir vegna framkvæmda á og við veg, sem kom út árið 2009, var meðal annars kveðið á um að Vegagerðinni væri falið að skrifa nánari reglur um útfærslu og framkvæmd vinnusvæðamerkinga. Í reglunum eru strangar kröfur um þekkingu og réttindi þeirra sem koma að þessum málum. Þar kemur fram að allir þeir sem koma að merkingu vinnusvæða frá Vegagerðinni og Reykjavíkurborg, og þeir verktakar, hönnuðir og eftirlitsmenn sem tengjast verkefnum á þeirra vegum, þurfa að hafa sótt námskeiðið Merking vinnusvæða og lokið prófi eins og gerðar eru kröfur um í reglugerðinni.

Fyrir hverja er námskeiðið

Námskeiðið er ætlað þeim verkkaupum, hönnuðum, verktökum og eftirlitsmönnum sem á einn eða annan hátt koma að undirbúningi og framkvæmd vega- og gatnagerðarmannvirkja, svo og öðrum þeim stofnunum og fyrirtækjum sem vinna að framkvæmdum á eða við vegsvæði.

Skipulagið

Námið er 16 klst. og kennt er tvo daga í röð frá kl. 9–17.

Kennsla fer fram sem staðarnám. Möguleiki er á að fylgjast með kennslunni í gegnum Zoom fjarfundabúnað í rauntíma, fyrir þá sem komast ekki á staðinn, en mælt er með því að mæta á staðinn. Kennslan er ekki tekin upp. Vinsamlegast athugið að námskeiðið er haldið í Háskólanum í Reykjavík.

Hagnýtar upplýsingar

Þátttakendur fá aðgang að kennslukerfi HR þar sem allt kennsluefnið er. Nauðsynlegt er að taka með sér eigin tölvu á námskeiðið með aðgengi að PowerPoint forritinu.

Vinsamlegast athugið að dagsetningar eru birtar með fyrirvara um að lágmarksþátttaka náist á námskeiðið.

Flest stéttarfélög niðurgreiða hluta námskeiðsgjalda fyrir sína félagsmenn. Athugaðu hvort þú átt rétt á styrk til að sækja nám eða námskeið hjá þínu stéttarfélagi.

Dagskrá

Dagsetningar auglýstar síðar.

Leiðbeinendur

Ylfa Rakel Ólafsdóttir
Verkefnastjóri – Vegagerðin

Björgvin Rafn Sigurðarson
Deildarstjóri afnota- og eftirlits – Reykjavíkurborg

Höskuldur Tryggvason
Verkefnastjóri – Vegagerðin

Víkingur Guðmundsson
Sérfræðingur, úttektir og eftirfylgni – Vegagerðin

Stefán Þór Pétursson
Verkfræðingur – Vegagerðin

Bjarni Rúnar Ingvarsson
Samgönguverkfræðingur – Reykjavíkurborg